L’aria che respiro
Alcune poesie tratte dal volume “Tre strane sensazioni” di Franco Chinnici
Careze
De quanto tempo, no te ga ricevu ’na careza?
De quanto tempo, no te ga sentido el calor de ’na man?
De quanto tempo, no te ga ’saporà un soriso vero,
’na tenereza, un baso?
Cossa xe ’na careza? Xe un belissimo segnai d’amor,
che te fa serar i oci, che te fa sussultar de gioia;
un atimo che volessimo durassi n’eternità,
un sogno che se avèra, un dir: “soridighe a la Vita!”
Quanto tempo xe passado da quela amorevole careza?
No poderò mai dimenticarmela, perché dopo,
un dolce baso la ga seguida!
Dove xe ’desso quela man legera, che me sfiorava el viso?
Ma, no se ’nacorzemo de quanto bisogno ghe xe,
de ’na careza vera, dada con amor!
Quante persone vivi insieme e no conossi el valor de’na careza?
Xe ’ssai strano, ma le robe più bele, più pure, le sta svolando via!
’Na careza dada co’l cuor, ghe va a un picio che pianzi,
a un malà che sofri, verso chi te tendi la man,
verso chi non credi più a la Vita,
verso chi che pensa de aver perdù ogni speranza!
Cossa xe ’na careza, se no un segno d’Amor
verso ’na persona cara, verso chi,
dopo gaverla ricevuda, sa dirte… Grazie!
Verso chi no ga parole, ma co i oci sa dirte
tuto el ben che el ga ricevù!
Voleria ’carezar tuti i omini de ’sto mondo
per poder trasmeterghe e farghe sentir,
quanta dolceza ghe xe, in ’na semplice,
amorevole, careza!
E alora, guida la tua man verso la persona che te ami,
’carezila, e te scoprirà che, se veramente la te vol ben,
te lo dimostrerà subito, ne‘l brilar de’i sui oci,
co’ un soriso, co’naltra careza, co’un baso…
Pasqua
Ogi xe domenica, no una come tante altre!
Ogi xe Pasqua! Cossa cambia?
Ogni domenica xe Pasqua! Cossa cambia?
La messa, la cesa piena de gente, i canti,
’na inata gioia nei oci de tante persone,
n’atmosfera mistica de ’n’esenza divina!
Lui xe risorto!
Quante domande me stago fazendo
’scoltando la predica!
Quanti perché me riciama, me stupissi!
Quanto drentro de mi sento ’sta Pasqua?
Quant’altre robe me coinvolzi, me smovi
dal torpor de ’sta incredula realtà? Lui xe risorto!
La forza de ’na presenza soranaturale me colpissi,
me sovrasta, traversa el mio cuor de piera
e pareria dirme: “Ecome, son qua, son risorto anca per ti”,
per darte speranza, pase e salveza!
Ogi xe domenica! Xe Pasqua! Cossa cambia?
Xe ’spiegabile tuto quel che go recepido
co ga finì la messa?
Sarò sta coinvolto e esultante in
’sto misterioso mesagio che me xe stado afidado,
da Lui che xe morto e risorto per mi?
Sarò consapevole de esser sta purificado,
lavado da quel’aqua e da quel sangue?
Saverò risponder a tante domande,
convinto e sicuro che Lui xe veramente risorto?
Ogi xe Pasqua! Son resta solo, solo con Ti, Signor,
in una solitudine piena de Ti, Signor,
co’ la speranza che almeno Ti
no te me ’bandonerà mai!
Ogi xe Pasqua! Resta con mi… Signor!
Nadal
Fra un per de giorni sarà Nadal
e le famiglie se riunirà per festeggiar!
Che bel trovarse,
ma solo per magnar?
Passarlo se dovessi con più vero sentimento,
guardandose nei oci con l’animo contento
ricordandose de co’ ierimo fioluzi,
de un mandarin e do nose ierimo felici!
E pur ogi, ch’el mondo xe cambià,
nissun xe più seren, xe tuto un blà, blà, blà!
Nadal dei poveri, che zerca tra le scovaze,
se xe qualcosa de magnar e anca straze!
E noi che grandi semo, ne ‘vanza de sprecar!
Dove xe la stela, dove xe Gesù bambin?
Ma i fioi i sà la storia? Ghe la gavè contàda,
de quel che xe nato in una stala?
E i tre Re, ve ricordè,
co ’ndavimo a cantar!
E i ne diseva che se saremo boni,
per regalo ne porterà bomboni!
Xe za un mese che qua in cità,
xe dapertuto iluminà!
Xe gente che gira e bagola,
ma pareria, che gnente i comprerà!
Ma i bori gira istesso per chi li ga e li sa doprar,
mentre altri, cinghia devi tirar!
Passà Nadal e l’ultimo de’ l’ano,
no resta altro che augurarse che quel che vegnerà sìa meio!
Befana, carneval e Pasqua e ‘vanti…
la rioda gira e girerà
e Nadal… sarà de novo qua!
L’Amicizia
La vera Amicizia xe come la salute,
no savemo ’prezarla finché no la la perdemo!
El vero amico xe quel che ’riva,
quando tuti i altri te ga ’bandonà!
Se un mio Amico se butassi zò de un ponte,
mi staria soto per poderlo al volo ciapar!
El vero Amico tientelo streto con do man!
Lui se ’pozerà a ti, e ti te se ’pozerà a lui e sarè ok!
L’Amicizia ze un pensier in do cuori!
No caminar davanti de mi, poderia no seguirte!
No caminar de drio de mi, poderia no saverte guidar!
Camina al mio fianco e te sarà mio Amico!
L’Amico ’scolta quel che te ghe conti!
L’Amico senti anca quel che no te disi!
L’Amico xe quel che conossi la canzon del tuo cuor
e pol cantartela anca quando te se dimentichi le parole!
Nela vita ognidun seguimo strade diverse,
ma indipendentemente da dove che ’ndemo,
portemo sempre co’ noi un tochetin de’ l’altro!
I Amici xe un esempio,
de come Dio se ciol cura de noi!
Sconossudo xe quel che dubita a diventar Amico!
Se te legerà ’sto brano, no disperar,
te saverà de ’ver almeno un bon Amico!