Autore: diana

Riceta de dicembre:

Riceta russo-barese de dicembre:
Stavolta metemo in piato i varieniki, ravioi che assieme al fredo i riva anche lori da la Russia.
Agiungemo un bis col preparar i “panzerotti baresi”.

 Varieniki

Aver za pronti:
20 deca de acqua tiepida
2 ovi freschi
1 cuciarin de sal
farina a volontà
ricota salada misciada col gialo de l’ovo

Se meti in una larga scudela sia el bianco che el gialo de l’ovo, el sal e la farina e se miscia el tuto, po se tira fora de la scudela el tuto compato e se lo lavora co’ le man su una tavola de legno, po’ se stendi el tuto fin a formar un cercio alto più o meno mezo centimetro su la tavola spruzada de farina perché no el se atachi e se lo bati coi dedi.
Se ciol un bicer, se lo volta  e se fa tanti picoli stampeti circolari, se li taja col cortel e in ogni stampeto se meti un poco de ricota. Se li sera ben e se li meti in una tecia con aqua bolente finché i vien a gala.
Intanto se recupera el resto de l’impasto e se forma altri stampeti circolari e se torna a far l’operazion co’ la ricota. Se li merti nel piato condidi con buro fuso e pana acida.
No savemo cossa che i ghe bevi sora in Russia, ma noi no semo gente de tciai……

Panzerotti baresi

Aver za pronti:
mezo chilo de farina
1 cubeto de lievito de bira
1 picola patata
ojo de semi, mejo quel de bagigi (arachidi)
persuto coto
mozarella o sotilete
ricota fresca furlana
1 cuciarin de salsa de pomidoro
sal fin q. b.

Lessar la patatina, meterla nel strucapatate e lassarla che la se sfredi. Meter in una terina la farina, la patina strucada, el sal fin, el lievito (za siolto in aqua freda) e impastar co le man el tuto per  5 minuti o se servi de più. Coverzer la terina con una strazeta de cusina e lassar fermo che el tuto lieviti per tre quarti de ora. Sul tavolo de legno spianar l’impasto col “mattarello”, con un bicerin rivoltado far dei picoli dischi, taiarli e dopo impignirli col ripien de persuto, ricota, mozarella, piegarli a metà e serarli con un piron, passarli legermente ne la farina e meterli ne l’ojo caldo a frizer.

In un piato meterli vizin i varieniki e gustarli con un rosso un poco frizzante.          

Riceta de novembre:

dopo la festa dei morti un tiramisù (invenzion lanfur) fa sempre ben a la salute

Tiramisù

aver za pronti:
50 deca de mascarpon
5 ovi freschi
25 deca e mezo de zucaro
8 deca de cacao amaro
40 deca de pandoro (o polentina)
400 ml de cafè amaro e fredo

Separar i giali dei ovi dai bianchi. Montar in una cicara ben larga  i giali dei ovi con el zucaro; zontar pian pian el mascarpon e a la fine anche i bianchi dei ovi sbatudi a parte in modo de formar una crema ben ferma. Coverzer co’ la pelicola trasparente la cicara e meterla nel frigo. Tajar su la tavola la polentina o el pandoro a striche longhe a forma de retangolo e bagnarle nel cafè fredo, meterle una vizin l’altra in una “pirofila”. Tirar fora del frigo la cicara e co’ un cuciar coverzer de crema le striche ne la “pirofila”, dopo meterghe sora altre striche de polentina bagnade nel cafè e zontar altra crema. L’ultimo strato de crema risulterà abondante. Coverzer co’ la pelicola la “pirofila” e lassarla in frigo per più de tre ore. Ne l’ultima tociada de striche nel cafè fredo se pol meter un bicerin de marsaleta o un liquor dolze.    

Se decora l’ultimo strato de crema col cacao amaro. Se bevi in compagnia el resto de la marsaleta.

 

Riceta de otobre:

Torta de patate

aver za pronti:
un chilo de patate
un ovo crudo
formajo grana gratado
1 confezion de prosciuto coto a cubeti
1 confezion de panzeta dolze a cubeti
salumi vari tajadi a cubeti
formajo stagionado tajado a tochetini o scaje
buro e farina

Lesso le patate e le lasso che le se fredi, le  spelo e le tajo a tochetini in una terina, le mastruzo co’ el piron, ghe zonto el bianco e el gialo de l’ovo co’ un fia de sal de sora e miscio el tuto co la zonta dei tochetini de tuti i salumi e a la fine zonto anche el formajo stagionado e miscio de novo. 

In una terina larga imburada sul fondo e legermente infarinada ai lati verso el tuto, za ben misciado in precedenza; sora ghe distendo el formajo gratado con picoli tochetini de buro. Meto la terina nel forno preriscaldado a 170 gradi e la lasso per 20 minuti e po griglio per render crocante la superficie. Lasso fredar sul tavolo e tajo a fete più o meno larghe e servo. Va ben sia el vin rosso sia el bianco ma morbidi, esclusi vini tropo particolari come el pinot bianco o el refosco.  

 

Riceta de setembre:

Pasticio in sfoia

Aver za pronti:
una confezion de pasta sfoia
un eto e mezzo de prosciuto crudo
sugo de carne masinada, denso
bisi lessadi e passai in padela
funghi trifoladi
formaio a fete emmenthal o lateria
formaio grana a scaje

Preriscaldo el forno a 170 gradi; posiziono la sfoia su una cartaforno in una “teglia” da forno, coverzo la sfoia con el prosciuto, la ricoverzo con un strato de scaje grana, distendo de sora un altro strato de sugo fredo, meto un po’ qua e là i bisi e i funghi fredi, coverzo tuto con la sfoia come se fa per el strucolo. Tajo apena apena la sfoia con taj orizontali e meto nel forno per 20/25 minuti; quando vedo che la sfoia la xe dorada e crocante, verzo el forno e la tiro fora. La taio e servo nei piati. De bever un vin rosso e un poco frizantin. 

 

Riceta de agosto:

Gnochi de susini

Aver za pronti:
1 chilo de patate
un ovo
un poco de sal
zucaro
2 cucirai de pan gratà
130 grami de buro
350 grami de farina
una spruzadfa de canela 

Ale patate lesade e schizade te zonti l’ovo e poco per volta la farina. Te fa l’impasto e te lo lasi riposar per 20 minuti.
Te cavi l’oso ai susini e te inpinisi ogni un con un cuciarin de zucaro.
Con l’impasto steso te fa dei dischi e te ghe posi sora el susin e te lo avolgi.
Cusina tuta sta roba in acqua bolente un poco salata. Quando i vien a gala te li scoli.
Dopo averli mesi in piato te ghe  versi sora el buro che te ga squaià in precedenza e zontà pan gratà e zucaro. Ala fine spruzza un poco de canela

Bon apetito!!!!

Riceta de lulio:

Torta de pomi

Aver za pronti:
1 chilo de pomi
9 cuciari de farina
“        “      “   zucaro
“        “      “   oio de semi
3 ovi intieri
1 bustina de lievito
“      “         “  vanilia
buro q.b.
1 gratada de scorza de limon
rhum o altro liquor q.b.

Imburo  la farsora granda e po sistemo i pomi tajadi a fete.
In una scodela granda meto dentro tuto el resto e missio col cuciar de legno; finida la mescolada la buto sora i pomi in modo de coverzerli e meto la farsora in forno a 190° per 35 minuti.

Dolze, delicato, leger e gustoso!

Riceta de giugno:

Ovi in forno, piato unico per 4 acompagnado con verdure fresche

Aver za pronti:
5 ovi
500 ml de crema de pana senza zucaro (do scatolete)
senape in abondanza (magari quel miscià co’ la bira)
sal e pevere q.b.

Mescolar ben in una bacinela la pana col senape, el sal, el pevere fin a  aver un impasto picante po svodar el tuto in una “pirofila” con za dentro fiocheti de buro e sora posai 5 ovi intieri (bianco e rosso), vardando che no i se tochi.
Meter la “pirofila” in forno a 220 gradi per 20-25 minuti. Controlar ogni tanto: quando vedarè che se ga formado una crostisina color oro vol dir che podè tirar fora del forno la “pirofila”. Servir caldo e bon apetito.

Riceta de magio:

Strucolo a la carsolina

Aver za pronti:
un ovo
oto deca de pangratà
sei deca de buro
sete deca e mezo de zibibe
sete deca e mezo de nose
quatro deca de pinoi
canel q.b.
zucaro q.b.

Prontar una sfoia co la farina, l’ovo e poca aqua smorta (tiepida). Meterla su un un largo tovajol posado su una tavola de legno e tirarla ai bordi pian pian, se la se rompi ripararla con dei biechi tajai prima e conservadi aposta; distendere su la sfoia, meno che longo i bordi, un ripien de nose e zibibe butai prima in una farsora con dentro el pangratà rosolado nel buro. Ciapar ai bordi in alto el tovajol e rodolarlo, serarlo ben ben a le punte e come che el sta meterlo a bojr almeno un’ora in tanta aqua salada. Dopo meter el tovajol su un piato longo e sdrodolarlo, tajar a fete el strucolo e con un penel  spenelarlo de buro “fuso”, zucaro e canela (sta ultima se piasi) o anche [novità] con buro “fuso” e formaio de gratar (= parmiggiano). Servir sempre caldo.      

Riceta de april

La prima riceta de l’ano 2018 xe questa del mese de april:

Useleti de carne

preparar sei deca de girelo a fetine
              panzeta a fete
              parsuto a fete
              foie de salvia
              farina
              oio e sal
              vin bianco
              (salsa de pomidoro)              

Bater le fetine de carne, salarle e meterghe su de ogniduna una feta de panzeta e una de parsuto co’ una foia de salvia. Far i involtini e piazarghe dentro a ognidun un stecadente perché se no i se poderia verzer.

Rosolar in una farsora l’oio de oliva quanto basta, zontar un cuciar de farina bianca, un bicer de vin bianco e, a piazer, un cuciarin de salsa de pomidoro (conserva); coverzer con poca aqua e ultimar el tempo de cotura. Servir i useleti  che sul piato i va compagnai con purè de patate o polenta.