RICETE PER L’INVERNO DEL 2019

Limoncelo

1 litro de alcool a 90°
750 gr de zucaro
13 decilitri de aqua
7 limoni, quei co’ la scorza verde, ogi se disi biologici

meter el zucaro ne l’aqua cussì se forma un sciropo e a parte al fredo zontar a l’alcool le scorze dei limoni, tegnir in fredo per 7 giorni po filtrar, far boir l’aqua col zucaro e el resto dopo meter la botilia al fredo.

Fasoi “regina” ne la trapa

30 deca de fasoi

meter i fasoi a mollo ne l’aqua, dopo averli lessadi ben, se li meti nel sal per 20 minuti zontando un poco de ojo de oliva; se li tira fora e se li lava co’ un poco de trapa; se li meti in un piato coverzendo le aciughe senza spini, per ultimo agiunger pochissima maionese e servir.

Zivolete soto ojo

1 chilo de “cipolline”
5 grani de pevere
2 cuciari de cusina de ojo

meterle in una tecia con 2 litri de aqua salada a bojo pin per 2 minuti, scolarle de l’aqua e meterle in un vaso de vetro e coverzerle con asedo caldo e lassarle cussì per 24 ore; prima de meter el covercio sul vaso versar i 2 cuciari de ojo col pevere, conservar el vaso in cantina per 45 giorni, dopo le xe pronte per esser magnade.

Ricete per le castagne

1- meter 1 chilo de castagne lessade (se le trova pronte in negozio) per 30 minuti a fogo lento con rosmarin, lavarno e sal, dopo se le lassa tociade nel brandy per 2/3 ore; se le fa caramelar assieme a 3 eti de zucaro, el sugo de 1 limon e mezo bicer de aqua, zontar a fredo un poco de brandy e meterle in un vaso conservandolo in scuro per 40 giorni minimo.

2- cior 20 castagne lessade; meter in smojo 20 mandorle e 20 nosele; spacarle in picoli tochetini e versarle in poco più de mezo litro de cognac zontandoghe una scorza de limon e casomai un per de goce de angostura; lassar la botilia serada a mezo sol per almeno 20 giorni e prima de servir zontar 2 cuciari de sugo de zariese e mirtilo, mescolando el tuto.

Trapa co’ erba “luigia”

caramelar con 7 eti de zucaro, el sugo de 1 limon e una scorza de lo stesso 81 foie de erba “luigia”, zontar 7 ciodi de garofano; dopo imbotiliar el tuto in 1 litro de trapa e lassar 6 giorni la botilia in pien sol; dopo aver filtrado se pol bever.    

Torta salada con porri e nose

80 deca de porri
1 yogurth
4 ovi
6 deca de nose
2 cuciari de buro
sal, pevere e “peperoncino”

tirar via la parte verde dei porri, taiarli ognidun in 4 parti e scotarli co’ l’aqua bolente, scolarli, ridurli a fete e rosolarli in una padela con el buro per 4 minuti, zontarghe el sal col pevere, stender su la tola la sfoja za pronta e distirarghe i porri de sora. Nel fratempo in una scodela bater i ovi col yogurth sal e “peperoncino” e versar el tuto sui porri, dopo zontar le nose fate a tocheti; meter in forno za caldo a 200° per circa 25 minuti la sfoja. Servirla tiepida. 

Torta salada coi cipoloti

un bel cespo de cipoloti
3 cuciari de buro
30 deca de luganighe de viena
1 dl de pana
3 cuciari de senape
2 ovi
2 cuciari de grana gratado
sal e pevere

rosolar con el buro i cipoloti taiadi sotili in una padela per 5 minuti, tajar a rondele le luganighe; mescolar a parte el senape, la pana, i ovi con el sofrito de cipoloti, zontar per ultimo un pochetino de sal e de pevere. Distender la sfoja con un bordo de 3 centimetri, sbusar el fondo con un pirone depositar de sora le rondele e su queste versar el misto de cipoloti, ovi ecc., far un velo de formajo de gratar. Cusinar in forno caldo a 200° per 35 minuti. Servir ben caldo.

Torta salada coi articiochi e formajo

8 cuori de articiochi
15 deca de salame fato a tocheti con luganiga fresca
8 deca de grana gratado
15 deca de Emmenthal originale
1 bicer de pana liquida
1/2 cuciarin de origano
3 cuciari de ojo de oliva
sal e pevere

distribuir su la pasta sfoja metà del formajo gratado, sistemar i cuori de articioco, butar quel poco de origano che se ga, sistemar i tocheti de salame e luganiga con el resto del formajo Emmenthal tajado a fetine con quel za gratado, dopo semicoverzer co’ la pana liquida el tuto, zontar un poco de pevere e sal. Scaldar el forno a 180° e lassar drento la sfoja per 40 minuti. Servir tiepido.

Al posto dei articiochi su la pasta sfoja sbusada se pol meter prosiuto coto o crudo e speck su un fondo de radicio de Treviso, besiamela con un spolverio de fontina o formajo, besiamela, funghi e prosiuto o spinaze lessade con sora ricota e ovi duri o ancora funghi, besiamela e gambereti. Un bicer de Malvasia no staria mal per la sede …

Proja o torta salada che fa i serbi a Trieste

12 cuciari de farina de mais
4 cuciari de farina bianca
3 ovi
2 dl de yogurth intiero
2 dl de aqua minerale gassada
25 deca de formajo fresco (es.; mozarela,  strachin…)
1 dl de ojo
1 bustina de lievito

in una grande scudela misciar tute ste robe, formajo a parte; dopo tajar a cubeti picoli el formajo e agiungerli a sta missianza, a la fine depositar el tuto in una grande padela larga o stampo, ontolada de ojo, e meterla nel forno za scaldado a 180° per 25 minuti circa.

Torta a lo yogurth

3 vaseti de farina bianca
1 vaseto e mezo de zucaro
1 vaseto de yogurth intiero
3 ovi
1 vaseto de ojo de semi
meza bustina de lievito

in una grande scudela versar el vaseto de yogurth e con sto vaseto svodo impignirlo de zucaro e svodarlo ne la scudela, poi impignirlo de ojo de semi e far lo stesso. Meterghe drento anche i ovi e sbater el tuto possibilmente con una frusta eletrica (se fa prima). Agiunger la farina, un vaseto a la volta e el mezo vaseto de lievito, in modo che sta missianza la vegni compata. Butar pian pian sto amalgama in un stampo de 24 cm. circa imburado e infarinado e meterlo nel forno riscaldado za prima a 180° per 25 minuti circa. 

Torta a la ciocolata

20 deca de farina bianca (o integrale come che se preferissi)
1 deca e mezo de fecola
15 deca de zucaro de cana
1 bustina de lievito
4 deca de cacao amaro
5 deca de mandorle senza scorze
8 deca de ojo de mais
25 deca de late de riso
un bic de sal

Rompè le mandorle in pici tochetini, dovè meterle insieme a la fecola e a el zucaro, al sal, al lievito,  al cacao; sbater con forza el tuto e amalgamar con late e ojo. Tornar a mescolar el tuto in modo de rivar a aver un impasto lisio e omogeneo come una crema un poco salda, che bisogna lassar riposar per un poco de tempo; in sto intervalo preparar un stampo (andaria ben uno tondo de 22 cm.) e meterlo in forno za riscaldado a 180° per mezora. [Torta che ricorda quela ungherese dei Rigojanci: un pasticer venezian molto bravo jera emigrado a Viena e po a Buda-Pest, el se ciamava Giovanni Rigo e el ga dedicado la torta a una sua inamorada che lo ciamava Rigo Jancsi e eco che tuto torna…]  

“Focaccine o muffin” dolzi con i pomi

2 pomi grossi tajadi a tochetini
15 ml de late
20 deca de farina bianca (o integrale)
2 ovi
1 bustina de lievito
5 deca de zucaro
6 deca de buro
1 bic de sal

in una scudela lavorar co’ le man el buro, za trajado a tochetini, zontando un poco a la volta el late fin a arivar a aver una crema omogenea; in una terina a parte mescolar el lievito, la farina, el zucaro, el bic de sal, po zontar al secondo impasto la crema e missiar ben ben el tuto; zontar i tochetini de pomi. Meter el risultato de sta missianza in tanti picoli stampi riempindoli ognidun per tre quarti, meterli tuti nel forno za scaldado a 180° per circa 20 minuti.  

Cuorisini

pasta frola
3 rossi de ovo
3 bainchi de ovo
6 deca de zucaro
5 deca de mandorle ridote a picoli tochetini
12 deca e mezo de buro
25 deca de farina
1 scorza de limon
un bic de canela

comprar una pasta frola e farla diventar sofice, tajarla a cuorisini;  spalmar un stampo con un impasto de bianchi de ovo, montadi a neve, con el zucaro, le mandorle, el bic de canela e una gratadina de scorza de limon e meterla nel forno za scaldado a 180°     

  

---

 

Strucolo de nona

Strucolo de nona, unico e vero strucolo dei rioni triestini
mezo chilo de farina
1 ovo intiero fresco
2 giali de ovo
38 deca de zucaro
8 deca de buro
3 deca de lievito
30 deca de pangratà
20 deca de zibibe
10 deca de pinoi
10 deca de buro sfrito con 2 pomi
goce de zavaion

Meter su la tola de legno la farina, i tre ovi, el lievito, i 8 deca de buro taiado a tocheti fini, 8 deca de zucaro, impastar co’ le man el tuto e lassar lievitar in una straza al caldo e al scuro. Dopo stende la sfoia tirandola ai lati, coi biecheti taiadi in parte meterli al posto dei busi che se ga formado tirando la pasta, “ingrasaral” co le goce de zavaion. Po in linee orizontali distender el pangratà, el zucaro restante, le zibibe, i pinoi, i pomi tajadi a tocheti, rodolarlo co’ un grande tovajol, operazion delicata, serando i finai ben co i diti in modo che no scampi gnente fora, meterlo nel stampo, – mia nona usava le vaschete de smalto nero dei laboratori de benzina de “L’Aquila” de Zaule – e lassarlo nel forno per 50 minuti. Tirado fora co’ un cuciarin spolverar co’ un poco de pangratà meso nel buro squaiado in un tegamin. Lassarlo che el se sfredi e po taiarlo a tochi. Esisti la variante co le zariese però xe più complicato perché le mola aqua nel forno.       

Ricete per el 2019 de mama Pina

Insalada grega

2 pomidorini rossi e giali  de insalata
1 zivola rossa del Carso
1 cucumero
1 peveron gialo
10/15 olive nere greghe senza osso
20 deca de feta
olio de oliva extravergine
sal 

Prima de tuto lavar ben la salata e tajar, quando che la xe suta, le foie a tochetini per meterle in una scodela. Tajar cussì anche el pomidoro, scartando i semi e le parti dure, tajar a picoli cubi el cucumero, el peveron e la zivola e tute le olive ocorenti a striche sotilissime. Zontarghe l’insalata e la feta tajada a cubeti, condir con ojo e sal.   

 

Pan con salame e verdure

1 filon de pan integrale
10 deca de salame tenero
4/5 foie de salata
2 pomodori maturi
8 fete de formaio Emmental
foie de basilico
2 cuciari de ojo

Verzer in due el filon de pan e riscaldarlo su una piastra spenelando la parte interna con l’ojo. Distirarghe sora le fete de salata ben lavada e sugada, meterghe sora le fete de salame, el pomodoro taiado a fetine sotili, el basilico, serar el filon e magnarlo quasi caldo con un bicer de merlot.

 

Oveti in paruca   

10/12 ovi
do picole scatole de tono
olive, peveroni, cucumeri, caperi

Lessar i ovi, sgussiarli, tajarli a metà per longo, tirar via i giali e a parte missiarli con purè o pasta de tono in scatola; riempir i bianchi de i ovi con sta missianza, coverzerli con un legero strato de bessiamela e su ognidun pozarghe sora tre caperi o meza oliva verde, nera o un tochetin de pevaron rosso, gialo, verde o un tochetin de cucumero o un altro de formaio in modo de formar un arcobaleno de colori, infinzarli ognidun con un stechin, sistemarli in un piato e che ognidun se rangi a cior su el color che più ghe piasi.

 

Minestra de pedoci per 3 o 4 persone (zuppa di pidocchi)

1 chilo de pedoci
10 deca de pangratà
1 botilia de ojo extravergine de oliva
pan de struza
perzemolo
ajo

Lavarli e lessarli con aqua bastante e spelarli, in una pignatela abastanza grande  meter a frizer l’ojo e quando che el xe caldo rosolar el pangratà con persemolo e ajo, a la fine butarghe dentro i pedoci con tuta l’aqua. A parte preparar el pan de struza taiado a fete strete, frizerle ne l’ojo e butarle ne la pignata de la minestra. Se pol servir co’ una malvasia del Carso, che ga le doti de no esser dolze o un ribola.

 

Pomidori fredi ripieni

4 pomidori grandi maturi
20 deca de tono in scatola
1 baratolo picolo de mais
2 ovi duri
10 olive senza osso
2 cuciari de maionese
1 botilia de ojo extravergine de oliva
sal

Tajar subito la parte superiore dei pomidori, svodarli con un piron e meter la polpa su un piato fondo. Salar l’interno dei pomidori e meterli a scolar su un scolapasta. Spacar la polpa dei pomidori e zontar i voi duri, metà de la scatoleta del tono, le olive tute taiade in picoli tocheti, unir el maisa scolado e se se vol anche tochetini de peveron rosso.: condir con poco olio e sal. Meter nel frulator el resto del tono con la maionese cussì de otener una “mousse”. Meter el primo composto nei pomidori e sora la “mousse” a forma de “ciuffetto”.      

 

Misto de montagna

1 chilo de pomodori “pelati”
persemolo
2 foie de basilico
4 funghi porcini
10 deca de “cotechino” tritado
1 botiglia de ojo extravergine de oliva
1 nose de buro§1 ajo batudo 

Ne la pignata se meti l’ojo necessario e una nose de buro; quando l’ojo xe caldo se ghe buta l’ajo batudo, el persemolo, i funghi, el “cotechino”, quando i comincia a assorbir l’ojo zontar i pomodori “pelati” e tritadi in precedenza col basilico e lassarli che i se cusini per 5 o 6 minuti, se se vol zontar sal e pevere.
Un malbeck domaco va ben per digerir el tuto.

Tortelini assai economici (autarchici, jerimo nei ani Trenta)

30 deca de farina
3 cuciari de ojo
3 cuciari de zucaro
1 ovo fresco intiero
meza polverina de lievito
scorza de limon gratada
un bic de sal

Impastar el tuto, lassar la bala dura coverta co’ un tavaiol per 45 minuti, distirarla in striche su la tavola de legno e taiar biechi de 2 centimetri, meterghe dentro quel poco, che xe restado durante la setimana de porco (mortadela, coto, crudo) e serarli in tondo con un buso in mezo; e eco i tortelini, el bunigolo de Venere, frizerli in ojo abondante.

Cossa servi per preparar la gelatina de Pasqua

Prima lavar e dopo cusinar con abondante aqua el rosmarin, 2 spighi de ajo, una zivola picola, pevere, mazoran e in fondo 4 foie de lavarno. Dopo agiunger tuto el resto. 

Nido de rondini

40 deca deca de maroni o 30 deca de castagne seche messe ne l’aqua calda
15 deca de zucaro profumado a la vanilia
1 litro de late
1 quinto de pana “fior di latte”
5 deca de cacao in polvere
1 polverina de fecola de patate
mezo bicer de cognac

Cusinar le castagne nel late fin che el late vien assorbido. Tirar via dal fogo la pignatela, zontar el zucaro, el cacao, el cognac e passar el tuto e passar el tuto sullo “staccio” pressando con forza. Spolverar con fecola de patate un stampo basso lisso con bordura alta e impignirlo col risultato del composto, passado una seconda volta sullo “staccio” in modo che el resti legero “soffice”. Dopo con cura versar el tuto sul piato de servizio lassando libero el centro, che va riempido de pana montata. Spruzar le castagne con el cacao in polvere ragrumai in “chicchi di riso”. 

I veri nidi de ronedine costava tropo nei ani Trenta importarli da la Thailandia, però bisogna osservar che za nel ‘700 i richi come el vescovo Colloredo de Salisburgo ghe ofriva a pranzo ai sui musicisti vin del Sud Africa e i famosi veri nidi de rondine.

Persighi a la regina

Se taja a metà i persighi maturi, tiradi via i …., se li spolvera de zucaro a velo. Per dieci minuti se sbati tre giali de ovo misciai con dieci deca de zucaro a la vanilia. A parte se sbriciola “amaretti e biscotti” e se li passa allo “staccio”, se li miscia con do ovi e un poco dopo se ghe zonta tre bianchi de ovo sbatudi a neve. Missiafda tuta sta roba preparada a parte se impinissi el centro dei persighi usando una piria de carta forte, dopo su ogni riempimento se meti meza mandorla. Se li meti nel forno ben caldo a 200 gradi per 10 minuti finché se vedi che i ga ciapado un bel color come l’oro. Se li tira fora e se li meti nel vassoio de servizio. Al sugo rimasto ne la padela se zonta una trapeta de fruti o nesèole, che se cusina a fogo lento per 10 minuti. Sto sugo concentrado sarà versado sui persigni, che i vegnerà servidi fredi.    

Punta a la triestina

1 deca de formaio gratado
5 giali de ovo
1 zivola
perzemolo
late
burro
grasso de vedel
pan molo
striche de prosiuto crudo

Se taja a fetine una grossa zivola e se la meti in una padela a fogo molto debole e apena se vedi che la zivola xe ben rosolada se la tira via dal fogo e se ghe meti sora 5 giali de ovi ben sbatudi a parte, formajo gratado tipo parmigiano, perzemolo, striche fine de prosiuto crudo. Se tira fora de una bacinela la polpa de pan integrale messa nel late strizandola e se la deponi sora el prosiuto. Se vegnerà a formar cussì, misciando el tuto, un impasto duro ma legero. Se fa un tajo ne la punta picola de vedel e se meti dentro l’impasto cusendo la punta dove la xe stada taiada. In una farsora se distira el grasso de vedel e burro e se ghe meti sora el ripien. Se la meti in forno  a 60 gradi, spruzzandoghe sora un per de volte un vin bianco seco. Dopo un’ora e mezza verificar la cotura con un ago introdoto nel ripien del vedel. Se no basta e se  l’ago ga ancora un poco de sangue andar avanti co la cotura. Cota la punta se tira fora del forno la farsora, se sfila el file che la tegniva cusida e se la taia a fete. Servir con contorni de fasoleti.     

Biscoti de mandorle

35 deca de farina
2 ovi
2 giali de ovo
2 cuciari de buro liquido
2 cuciari de mandorle marinade
1 cuciar de scorza de limon gratad
20 deca de zucaro
mezo cuciar de polverina de lievito

Far un incavo nel centro del monte de farina svodada su la tavola de impoasto e meterghe dentro l’ovo, i do giali de ovo, el buro, el limon, le mandorle, el zucaro, el lievito e se xe necessario anche un poco de aqua. Lavorar co’ le man el tuto a massa in modo che no el risulti né duro né tenero, po spianar a mezo cm de spessor e taiar con stampeti pronti, metreli in una lamiera ontolada con un altro ovo sbatudo e farli arostir in forno ben caldo a 200 gradi per alcuni minuti. I biscoti se li pol magnar dopo averli tociai ne la “prugnetta mandorlata”. Mejo no meterse a la guida dopo…

Bleki carsolini con le verdure per 4 persone

30 deca de farina de gran tenero
1 zucheta
1 zivola
1 porro
4 ovi freschi
2 fete de speck
½ peveron
½ melanzana
1 botilia de ojo de oliva
1 botilia de ojo extravergine de oliva

Frizer ne l’ojo de oliva  la zivola, el porro e le altre verdure taiade a picoli dadi come el speck. Se fa saltar el tuto per 15 minuti e agiunger i bleki za bolidi, preparadi a parte con 30 deca de farina de gran tenero, bic de aqua calda, tre ovi e lavoradi a man fin che se forma una bala che po se la pressa su la tavola in tante striche no più alte de mezo centimetro, che vien taiadi come vien vien, più o meno de forma quadrata, messi in aqua calda per tre munti.  Zontar un minimo de ojo extravergine de oliva e servir.

Mlinci cragnolini per 4 persone

30 deca de farina 00
3 ovi
4 giali de ovo
1 nose de buro
erba cipolina
kren
buro
sal  

Preparar la pasta co’ la farina, i 3 ovi e sal quanto basta, dopo averla ben lavorada se la meti nel forno caldo a 200 gradi e quando la ciapa un color gialo se la tira fora e co un cortel se forma dei tocheti, che i vien messi in una tecia de aqua bolente per 2 minuti. Scoladi, saltarli in una padela col buro zontandoghe i giali de l’ovo, l’erba cipolina e el kren.

Fusi istriani  per 4 persone    

50 deca de fusi
5 foje de lavarno
concentrato de pomodoro in tubeto
meza galina preparada
3 zivole viola
2 foie de lavarno
1 botilia de ojo extravergine de  oliva
1 bicer de malvasia istriana
30 deca de farina
2 ovi freschi
2 cuciari de vin
2 cuciari de ojo
sal

In una padela meter le zivole taiade a fetine con un poco de sal, lassarle che le se sughi un poco e zontar l’ojo e frizerle per 5 minuti; zontar la carne de galina taiada a cubeti assieme al lavarno, meter un coverzo e lassar che el tuto se cusini per do ore a fogo basso, ogni tanto darghe una sbatuda e una guardada. A l’ultimo svodar el bicer de malvasia e dopo mezo tubeto de concentrato de pomodoro mescolado a parte in un padelin con un poco de aqua. Lassar che el tuto se cusini per un altra mezora. Zontar un poco de sal e servir con i fusi. Come se fa i fusi? Usar 30 deca de farina, 2 ovi intieri, e un bic de sal; se impasta el tuto co le man zontandoghe un bic de aqua per volta, po co la bala xe diventada dura la se meti al fredo o in cantina o in frigo per mezora. Distirarla su la travola de legno in striche e po taiarli a tocheti de tre centimetri de lato. Sul manigo, infarinado, de un cuciar de cusina se li piega ognidun per trasformarli in tubeti rotondi, Se li meti per 10 minuti in abondante aqua calda salada e se li tira fora e se ghe zonta el resto za preparado prima.

Jota estiva

Cusinar a parte i fasoi con tuta l’aqua de una scatola, mejo se fasoi no grossi. In una pignata ne lo stesso tempo cusinar le patate spelade intiere (ma dopo mastruzade ben ben). Ne la terza pignata vien coti i crauti, due luganighe, dieci o più tochi de panzeta. Quando boi el tuto se buta i fasoi e i crauti ne la pignata de patate. A l’ultimo se buta dentro mescolando un disfrito de ojo de oliva, un poco de ajo e un bic de farina poco cusinada; zontar el sal quanto basta. Lassar riposar la pignata, meter nei piati e servir con un bon bicer de teran fresco de cantina. Due giorni dopo, se vanza, la jota scaldada xe ancora più bona.   

Cossa xe la pignata triestina? Xe una pignata modelada a man in “argilla pirofila” dal M° vasaio Paolo Vecchiet e smaltada al suo interno – dopo esser stada cusinada in forno a 980 gradi per sei ore – con una vernise “silicea” trasparente senza piombo, ciamada “cristalina” da la ceramista Rossana Di Turo.  Dotada de un covercio con un diametro de 16 centimetri la pignata triestina garantissi una cotura altamente ecologica, che esalta i gusti de la vera cusina tradizionale e pol esser usada su piastra eletrica, in tuti i tipi de forno e anche sul metano. Il questo ultimo caso, dove la fiama xe circolare, la redina xe indispensabile per romper la fiama e per evitar de romper la pignata, perché la redina mantien la fiama bassa. Prima però de usar la pignata xe necessario  tignirla in aqua freda per 24 ore. Dopo, impignida de sola aqua, la se la porta a bolir per cinque minuti e ecco che la pignata la xe pronta per i propi usi.

_________________________________________________________     

 

Ricete per la primavera 2019

Kaiser-Schmarren per 4

Preparar:
7 ovi freschi
farina
late
marmelata de susini
zibibe
buro
sal
zucaro

Meter tre zali de ovo in una piàdina larga, meterghe un bic de sal e sbaterli, zontar tre cuciari de farina bianca, missar ben e  slongar el tuto con un fià de late. Montar i bianchi de l’ovo a parte e zontarli ne la pastela. In una farsora frizer quatro fritaie, po se le fa a tocheti e se le missa con tre cuciarini de marmelada de susini (escluder le marmelate granulose) e un pugneto de zibibe. Se onzi el fondo de una pirofila con el buro e se meti dentro l’impasto con un cuciarin de zuchero svodado qua e là, se verzi el forno caldo e se meti dentro la pirofila per diese minuti fin che se vedi che el zucaro se ga caramelà. 

Minestra de orzo con funghi misti sechi per 4

20 deca de orzo perlato
5 deca de funghi sechi
2 Viena
1 zivola
un qurato de brodo de carne
2 deca de buro
oio extra de oliva
sal            

Meter i funghi sechi per un’ora ne l’aqua calda  in una scodela. In un altra meter a bagno l’orzo per ca. 3 ore. Scolarla e portarla a bolir ne la padela, sbassar el fogo de un poco e continuar a cusinarla per un quarto de ora ca. Agiunger le Viena e andar avanti per altri 20 minuti. Tirar fora i funghi sechi e rosolarli nel sofrito de zivola e aio (mi l’aio no me piasi e no lo meto), salar q. b. e quando se vedi chge l’aqua xe tuta vaporada meter i funghi ne l’orzo. Dopo altri 20 minuti tirare via la padela e servir la minestra calda. 

Chifeleti de farina  per 4

2 deca e mezo de farina bianca
5 deca de buro
3 deca de zucaro
1 ovo
lievito
late
oio de semi
sal

Su la tola preparar co le man un muceto de un quarto de farina bianca e co’ un dito in mezo far un buseto come un vulcano. Se buta dentro 5 deca de buro squaiado, un ovo intiero, 3 deca de zucaro, un bic de sal, una punta de lievito de bustina (ormai no se trova più el lievito fresco de una volta) squaiado in 2 cuciarini de late tiepido e se missia el tuto co’ un cortel e po co’ le do man fin che se otien una pasta lissa. Se la taia a tocheti e se la rodola co’ le man e se la taia avanti in tocheti più picoli dandoghe la forma de chifel de patate [qualchedun pol ispirarse guardando le propie gambe], A uno a uno se li meti e se li frizi in una farsora de oio de semi caldo. Rosoladi se li tira fora e se li servi caldi, fredi i piasi ‘ssai de meno…

Torta de sarasin per 4

25 deca de buro
25 deca de zucaro
25 deca de sarasin
25 deca de mandorle mastruzade
6 ovi
marmelada de bosco
1 bustina de zucaro de vanilia
pana montata

Meter insieme su la tola 15 deca de zucaro con el buro e i bianchi dei ovi e lavorar co’ le man el tuto fin a otener un impasto spugnoso. Agiunger la farina, le mandorle, el zucaro de vanilia e continuar a lavorarlo co’ le man. A parte montar i ciari dei ovi a neve con un poco de zucaro agiunto un poco a la volta. Meter insieme con calma i do impasti in una pirofila e lassarla nel forno, a meza cotura per un’ora ca. Lassarla che la se fredi, taiar la torta in do e agiungerghe de sora marmelada de mirtili rossi o marmelada de bosco Una spolverada rapida de zucaro a velo e servir co’ la pana montata freda.

La marsaleta acompagna el tuto.