Estate 2020
’RIETE: (21 Marzo – 20 Aprile)
Se gaverè coragio, ‘ndare ‘ssai lontan, e voi gavè coragio, de… far paura! Gavè vinto tante sfide, ve manca solo questa (voi savè quala). AMOR: ‘ncora per un poco de tempo (un (1) metro de distanza), dopo, ve sfogherè più che podè. SALUTE:dovè ‘ver pasiensa, dovè restar a casa finché Conte ve dirà che podè ‘ndar dal dotor! LAVOR: come per la salute: dovè restar a casa finché Conte ve dirà che podè ‘ndar a lavorar (ma sé zà in pension vinti ani)! BORI: ai pensionai nissun sussidio (euri) de Conte. ZOGO: a chi che xe solo: solitario; a chi che xe in copia: buraco venezuelan (sempre a un (1) metro). COLOR: zalo canarin.
TORO: (21 April – 20 magio)
Anca voi, come tuti, in ‘sto periodo spetè che Conte daghi el via libera per ‘ndar dal paruchier? No servi che scalpitè, la parola che dovè meterve in testa in ‘sto momento xe Santa Pasienza. AMOR: anca qua, Santa Pasienza; troverè un ‘Riete che ga perso la pasienza, e ve sfogherè. SALUTE: a parte la gamba mariza che ve diol, i ve ga rimandà za do volte l’apuntamento “urgente” che gavevi in ospedal! Forse che, prima che finissi ‘sta pan-de-mia (nona), …lassemo perder! LAVOR: gavè za dà; xe solo per quei che lavora in nero e che ga ciapà el redito de citadinanza (sempre in nero). BORI: xe vero che in ‘sti quasi tre mesi de reclusion gavè risparmià? Voi savè! ZOGO: xe diventà de moda far solitari anca se, se xe in quatro; ogni dun per conto suo col celular (sempre a un (1) metro). COLOR: rosatelo…..
ZEMEI: (21 Magio – 21 giugno)
Ieri partidi in piena a l’inizio de ‘sto ano con un mucio de idee, che dopo carnaval xe ‘ndade a farse friser, savemo perché! Sicome xe turdi de glava, gavè rimandà tuto a più ‘vanti, quando Conte ve darà el beneplacido. AMOR: se gaverè pasienza de spetar el (tana, libera tuti) 18 de magio (forse anca dopo); sarè ricompensai da un Pesse (segno) che troverè in ‘na sala de’speto del Burlo per un controlo ginnico-loggico che spetavi da tempo (voi savè). SALUTE: mai cusì meio de cusì! LAVOR: nonostante che se pensionai, no gavè pase, inveze de ‘ndar in vacanza, ‘ndarè a far griglia istesso ogni giorno, ma per i altri che xe in vacanza. Contenti voi! BORI: per fortuna se fortunai; piovi sempre sul bagnà, ma istesso pianzè el morto! ZOGO: buraco. COLOR: vinaza (bianco o nero va ben istesso).
CANCRO: (22 Giu – 22 Lul.) Voi cancreti troverè ‘na Verzine che la pensa come voi, ma solo per ‘na roba che no posso dir! ‘Sto mese (magio) sarà sfigà, per via de la Verzine (che no iera Verzine), ma istesso, ve digo: “Chi se contenta godi!”. AMOR: passerè n’estate de ….. con la Verzine, ma istesso dire: “Meio che gnente!”. SALUTE: ve diolerà tuti i ossi del colo e anca la gamba mariza ve farà bazilar! Un consiglio: caminada andante (2 otavi ) ma no tropo almeno do volte al giorno nel ragio de 500 metri, naturalmente co’la mascherina e col can. LAVOR: per via del colo, de la gamba mariza, de la Verzine, de i 2 otavi , o per via de…, ve ciolerè spetativa fin a setembre e dopo, ‘vanti. BORI: un consiglio: prima che li cioghi lori (lo stato), tireli fora de la banca e meteli dove savè voi. ZOGO: ancora per un mese, solitario. COLOR: nero china (Bisleri).
LEON: (23 Lul. – 22 Ago)
Cari leocini in ‘sto triste momento, quasi pena passà de forzada quarantena, sarè talmente scombussolai de glava, che ve rifiuterè de ‘ndar fora de casa. Ciaperè ‘na telefonada che ve aviserà ch’el zircolo Rena xe sta riaverto, ma voi no’ndarè! AMOR: mi so che voi savè, ma che za se saveva, che in ‘sto periodo no se pol far l’amor, per cui, rimanderè tuto a giugno. No ste trovar scuse, no gavè più vinti ani! SALUTE: no gavè più vinti ani, ma istesso ve faria ben de far un diese chilometri al giorno sempre nel ragio de zinquezento metri e, a parte el mal zalo, pe’l resto xe quasi tuto ok! LAVOR: tuti quei che no ocori star in pìe, preferibilmente quei sentai o, distirai ‘ncora meio. BORI: dopo ‘sta pan-de-mia (nona), gavè messo in taio tuto quel che gavè risparmia stando a casa. ZOGO: domino. COLOR: rosso fogo de russia.
VERZINE: (23 Ago – 22 Sett.)
Marzo e april lassemo perder; magio anca, ma giugno e dopo ‘vanti, per voi de ‘sto segno sarà un estate de fogo in tuti i sensi. AMOR: no ste gaver paura de frontar qualsiasi situazion: desideri, sogni, che ve se parerà davanti; ricordeve che se Verzini (solo de segno)… anca co’la mascherina! Gaverè mile ocasioni, sfrutele tute, ma ‘tente a l’Omo Calandra! SALUTE: mai come ‘sto ano sarè cusì in forma (de boio), che no corerà gnanca meter la crema (solare). Atenzion ai capi-giri. LAVOR: su-cesso in piena nel ramo professional co’ un Cavra co’i Corni che ve assumerà per passar le vacanze in campegio. BORI: nissun problema, nissuna spesa, se el paron del campegio! ZOGO: no xe el momento! COLOR: maron ‘ssai scuro.
BALANZA: (dal 23 Sett. al 22 Ott.)
Dopo ‘sta pan-de-mia (nona), “quasi” superada, gavè comincià a prepararve per passar quel che resterà de ‘sto està. Gavevi tanti progeti a l’inizio de’sto ano, ma i xe ‘ndài “quasi” tuti a pomele. AMOR: ve gavè imparà a volerse più meio ben co’la molie, anca se…, Co’ l’amante, nisba (la stà in altro comun). SALUTE: cure ‘stetiche e vinti Km. al giorno, ve farà star meio. LAVOR: stando serai a casa, gavè ‘ssai risparmià (no spris aperol, no caliceti, no osmiza); no vedè l’ora che verzi i locai! El lavor? Lassè perder! BORI: no podè tirarve indrio, gavè promesso che quando se tornerà (?) normali, ofrirè de bever a tuti, meno che un! ZOGO: no xe el momento. COLOR: verde sparago.
SCARPION: (23 Ott. – 22 Nov.)
Tre mesi richi de ‘venture (una xe pena passada)! Ve scontrerè co’un del vostro istesso segno (longhi) e anca co’un Pesse, mentre ‘ndarè dacordo con un Toro. AMOR: prospetive quasi bone se ciaperè l’iniziativa (voi savè)! Se, se singhel, troverè pan per i vostri denti! SALUTE: stancheza acuta, trope ore sentà! Moveve! LAVOR: co vedè un che lavora, ve ciapa (no mezo cul) giramenti de glava. Mi ve conosso, no gavè gnanca un poco de invidia!
BORI: gavè bona pension, paghè un bicer ogni tanto, spinaze! ZOGO: se bravi de zogar, ma no savè perder! COLOR: zalo pissin.
SAGITARIO: (23 Nov. – 21 Dic.)
Dopo un inizio ano, più cusì che culì in giugno rientrerè ne la normalità mantenindo sempre 1 mt. de distanza in tuti i sensi, unici e anca alternai (voi savè)! AMOR: se ‘ssai passionai dopo tre mesi de astinenza, ma le regole xe regole (1mt. de distanza)! Fine giugno ve sfogherè co’un Cavra co’i corni. El ve porterà al Molo Balota a ciapar sol; ciaperè la multa! LAVOR: ‘Sto està, ve vegnerà desideri strani, fantasie ‘rotiche, ma de lavorar, gnanca de parlar! SALUTE: consumerè ‘ssai energie, ma le ricupererè fazendo ‘ssai (?) ginastica erobica co’na cinesina. BORI: ve li magnerà tuti la cinesina. ZOGO:zoghi proibiti solo in copia! COLOR: verde speranza.
CAVRA CO’I CORNI: (22 Dic. – 20 Gen.)
Se ‘ssai agitai (strano); trovere un Cancro che ve farà passar i bolenti spiriti con promesse (?) ‘ssai galanti. Se ‘ssai determinai ma ghe cascherè come perognochi. AMOR: estate de fogo co’l Cancro (za dito); el ve porterà su l’isola che no xe, troverè ‘na rulot con drentro ‘na cinesina (la solita che lavora in zalo). Masagi (?) yure-vedici… a tuta’lè. SALUTE: gnente mal, a parte el solito dolorin de panza che gnanca con Euro-Carbon, no ve passerà. LAVOR: giusto quel che basta per pagar la cinesina. BORI: ve li presterà el Cancro, anca lui iera de la cinesina! ZOGO: cossa fa ‘na Cavra co’i Corni, un Cancro e ‘na Verzin? Il triangolo (?)… noooooo! COLOR: zalo cinesin.
AQUARIO: (21 G.en. – 19 Feb.)
Un ano de ‘ssai, ‘ssai cambiamenti; deciderè de star soli! Omini: ‘ndarè in ritiro spiritual in un convento de suore. Done: andarè in un convento de frati per istesso motivo de i omini. AMOR: Volevi star soli e ‘desso purghè! No savè cossa che ve perdè! SALUTE: rimembrar le membra, el corpo la mente e l’anima xe el massimo; forse gavè selto el momendo sbaià: l’està! (Voi savè)! LAVOR: co tornerè dal ritiro spiritual, cambierè lavor. BORI: oferta libera per el ritiro! ZOGO: el frate ga perso le zavate, suor Luzia le ga trovà! COLOR: capucino.
PESSI: (20 Feb. – 20 Mar.)
Voi se più furbi; solo un bravo pescador e un bravo grigliador ve pol fregar! AMOR: ‘Sto està, sarà meso està perché l’altor meso el colonia virus ve lo ga magnà! Nono-stante tuto (combinazion) se bravi pescadori, ma de tuto altro, (voi savè)! Usè esche (?) bone! SALUTE: Chi stà meio de voi? La Cinesina! LAVOR: finì l’està, sarè messi a la prova del fuoco in un local (combinazion) de pesse. Lavorerè do giorni e dopo ghe darè i oto giorni (voi savè perché). Per ‘na question de privacy, no xe bel che sapi tuti! BORI: gnanca quei de la liquidazion. ZOGO: de fioi: in boca ti, in boca mi, in boca al can, am! COLOR: nero de sepa.
SE NO CREDE’ VERIFICHE’
Febraio – Marzo 2020
ARIETE: come che disi el mio colega Fox, ‘sto ano se partidi co’l pìe sbaià. Dovè meterghela (voi savè a chi) tuta per risolver robe spiacevoli che fin a la fine de april, ve tegnerà su le spine. ‘Sto està, tuto ‘ndarà a posto! AMOR: proposte indecenti da un/a che gnanca no conossè! No ste lassarve bindolar! SALUTE: zerchè de moverve, fé qualche caminada piutosto che esagerar a far l’amor; no gavè più l’età. LAVOR: no ste pensar a co lavoravi, vive la vita de pensionadi; xe chi che ‘ncora lavora e pensa se riverà ‘ndar! BORI: chi più ga, più spendi; voi Rietini se a la vecia, spargnè! ZOGO: se volè ris’ciar, ris’cè, ma no xe el momento de ris’ciar.
TORO: ingrumerè i fruti de quel che gaverè seminà nel 2019. I propositi xe boni e gavè bone intenzioni, ‘tenti però, no far el passo più longo de la gamba. AMOR: farè ‘ssai cambiamenti (ma chi sé?) e a la fine (in aprile) troverè (voi omini) el patner giusto. Con ‘sta qua, passerè un estàte de fogo. Me dimenticavo la sarà Verzine, ma solo de segno. SALUTE: Se “quasi” in piena forma, sia fisica che interior. Tenterè istesso de far ‘na dieta, anca perché cinque chili de meno a la vostra età,vol dir tanto. LAVOR: zercherè pian, pianin de dimenticarlo anca perché, se neo-pensionai. BORI: con la liquidazion, pagherè tuti i debiti. ZOGO: solo in copia, possibilmente dopo mezanote.
ZEMEI: come sempre se ‘ssai quilibrai. Gaverè come sempre doti… nascoste che sfruterè al momento giusto. AMOR: filing con un Leon; gavè come amante un Pesse, el vostro patner xe un Cancro. L’amor funziona istesso: o con un o con l’altro. SALUTE: se rivè, fe ‘na caminada (vinti Km. al giorno – diese a l’andata e diese al ritorno) ogni tanto, vedarè che farè meio l’amor. LAVOR: investirè… tuta la pension in un progeto che solo voi savè. BORI: tuto per l’investimento; ‘tenti però, se ve andarà mal, resterè ciavai! ZOGO: casinò (investimento)!!!!!
CANCRO: ‘na strana inquietudine per certi strani pensieri che per ‘na selta sbaiada vostra, no ve darà pase. AMOR: se denovo single, ma no ste disperar! In aprile troverè l’anima gemela (Verzine), durerà dò mesi, troverè ‘n’altra (Balanza), dopo un mese ‘n’altra (Pesse) e in setembre sarè denovo single (Cancro). Un diria: quel che xe ciapà, xe ciapà! SALUTE: poderia ‘ndar meio. LAVOR: ve consolarè; se za in pension de vinti ani, cossa volè de più? BORI: gaver bori e esser soli: che tristezza! ZOGO: in dò, xe più meio zogar, che far sempre solitari.
LEON: dopo un genaio de ramadam per via dei chili che gavè cumulà per le feste, gavè deciso de continuar la dieta ‘ncora per un mese. AMOR: se iremovibili; alti e bassi, curti o longhi, magri o sgionfi, no ve lasserè bindolar da nissun; quel che volè lo savè solo che voi. SALUTE: se “quasi in forma (de la poltrona); deve ‘na mossa de corpo e no pensar za a cossa magnerè per Pasqua. LAVORO: no ste pensar tropo, cambiè poltrona ogni tanto, se no resta el buso. Dai, moveve ch’el sol magna le ore! BORI: tireli fora de la banca prima che sia tropo tardi! ZOGO: pericolosi: rulot russa, gnagno cativo e, cotecio co’l morto.
VERZINI: genaio no ve xe ‘ndà miga tanto meio ben, perché no volè mai scoltarme co ve digo: no strafàr, calma e géso, no corér, no bevér, no….., ma voi, ve piasi ‘ndar sempre oltra i limiti, e dopo, paghè sazio. AMOR: a parte l’età e el ris’cio infarto, no molè mai! Magari mi! SALUTE: eco perché no mole mai; perché se stitici. Limonada rosè xe la soluzion! Se no farà efeto, ciolè Eurocarbon! LAVOR: nonostante l’età, no gavè voia de far un clinz. Gavè ragion! BORI: mi so quanti che gavè, ma per ‘na question de privaci, no posso dirghe a tuti! ZOGO: de carte: scopa in dò, scopon sentifico in quatro e se se soli, solitario!
BALANZA: gavè lassà in sospeso de’l’altro ano tante robete ‘ssai importanti che dovarè proveder de sistemar ‘sto ano. AMOR: l’amante ve ‘sta tradindo, el vostro patner ve fa i corni, la babeta che ‘desso ste (omini) bazilando, ve magnerà anca… la camisa. ‘Ste ‘tenti, no! No gavè più “zinquanta” ani! SALUTE: Se continuè cusì, ‘ndarè in decompresion! LAVOR: no gavè più zinquanta ani se in piena decompresion e no gavè voia de far un clinz! BORI: cossa volè de più de la vita: un tucano, dò negroni, un amaro del capo? ZOGO: buraco venezuelan e anca dò numeri a loto: 41e 68.
SCARPION: a parte la bala che gavè ciapà sensa ‘nacorzerve el sete (7) de genaio, el resto del mese, no ve xe ‘ndà tanto mal, e, se ve lo digo mi, credeme. AMOR: ‘sto tasto xe ‘ssai delicato per ‘sti dò prossimi mesi, perché ve sucederà quel che voi no gavevi mai pensà. Ve lasserè co’l’amante e tornere a casa dal vostro patner che ve dirà cusì: Ti mi ga fato corni, no ti meti pìe qua drentro! Gasto capio! Sicome, per i otantadò ani che gavè, ringrazierè, e altra amante troverè. SALUTE: ve la magnerà tuta ‘sta altra amante. BORI: ve li magnerà tuti ‘sta nova amante. ZOGO: quei pochi bori che ve resterà, li zogherè sul tavolo verde puntando tuto sul rosso. Come che andarà no posso dirve.
SAGITARIO: carissimi de ‘sto segno, mi sò, anca voi gavè comincià mal ‘sto ano, per via che, dopo el zenon de l’ultimo, se ‘ndai via sensa pagar el conto, quindi, risolverè ‘sto problemin che ve tien sui spini, no prima de marzo. Me conterè come ‘ndarà el processo. AMOR: momento confuso, ma solo momentaneo con vostro patner. Se andarà mal el processo (me xe ‘sta dito da un spion) ve molerè per sempre. LAVOR: sarè tropo sorbidi che ve passerà la voia de lavorar anca in nero. SALUTE: ‘sto mese sarè ‘ssai zo de bala, ma prima de Pasqua ve rimeterè in sesto e ve impegnerè con longhe caminade e dieta del minestron! BORI: se sfortunai in amor. ZOGO: no vinzè gnanca a briscola scoverta.
CAVRA CO’I CORNI: anca voi ste zercando l’anima gemela; la troverè prima de’l’estàte. Sarè sài impegnadi per altre robe, ma ve sarà indispensabile gaver ‘na persona vizin. Anca se sarà un Cancro, l’importante xe “relazionar”. AMOR: se tuto ‘ndarà ben, sarà solo merito vostro, ma no basta solo “relazionar”! -Capito!- LAVOR: pe’l momento no gavè tanta voia; casomai senteve, impizè la tv, o pur fe ‘na partida de dama, ‘na caminadina, e sperè che no la ve vegni mai. “Lavor sarà che voi no sarè!” BORI: ‘n’altro tasto delicato; chi che pensa che li gavè, se sbaia ‘ssai de grosso e anca de fin. Vivè a la giornada, ciapè tuto quel che podè (anca in Amor, se rivè), ma ricordeve de tornar, no solo ciapar! ZOGO: se se in dò, ve consiglio ‘na scopa… a quindise (?) in meno!
AQUARIO: ‘sto ano se partidi in quarta e co partì, partì e… chi ve ferma più! ‘Tenti però ai Pessi. El Sagitario (come patner) inveze, ve ‘ndassi meio, ma troverè un Scarpion. AMOR: proprio ‘desso che volevi star un poco in pase per rifleter, ve xe rivà un Scarpion. Ve gavevo ‘visà! Durerà quel che durerà, ma istesso co’l’energia che gavè riverè starghe drio, anca davanti, ma pagherè sazio. LAVOR: mi sò, perché son strologo, no volè gnanca sentir nominar ‘sto vocabolo: “lavor”! SALUTE: dovè ricuperar; paghè ancora del squilibrio alimentar de le feste natalizie! Cossa vol dir? Dieta ferea, se nò el Scarpion ve mola. BORI: grazie a ‘na bota de cul, passerè un momento fluido, roseo (de scasela), almeno fin a magio. ZOGO: in magio andarè al Casinò e ve magnerè tuto quel che ve xe restà de la bota de cul.
PESSI: ‘sto ano, dopo le feste, se ve ricordè ben, gavevi magna pesse ‘varià, quindi, se partidi ‘ssai, ‘ssai, mal (disenteria acuta);prima de carneval, credeme, ve passerà. AMOR: causa ‘sta disenteria, no podarè sfrutar al massimo le vostre strane voie. In marzo troverè l’equilibrio giusto e tornerè in auge anca se, se single. LAVOR: fin a marzo sarè messi a dura prova per quel che ve gavè messo in testa de rivar far, ma a la fine, come sempre, no riverè. – Coragio! – BORI: co’i bori no sté tanto mal, gavè bona pension, ma contro la dissenteria no xe euri che tegni. ZOGO: xe meio che lassè perder, almeno fin che no ve passa (la dissenteria)!!!