Biscoti de mandorle
35 deca de farina
2 ovi
2 zali de ovo
2 cuciari de buro squaià
2 cuciari de mandorle “marinate”
1 scorza de limon gratada
20 deca de zucaro
mezo cuciar de polverina de lievito
Far un buso sul mucio de farina messa su la tavola, drento ghe metè un ovo, i do zali, el buro, la scorza de limon, le mandorle, el zucaro, la polverina de lievito, e se necessario anche un pochetin de aqua. Lavorar tuta la massa con le man in modo che no la diventi né dura né tenera. Spianarla a l’altezza de mezo centimetro e taiar con stampeti, onzer con un ovo sbatudo, anche el stampo de lamiera dove se deposita i stampeti e meter in forno ben caldo per un quarto d’ora.
Chifeleti de farina
1 quarto de farina
5 deca de buro squaià
3 deca de zucaro
1 ovo
un fià de sal
un fià de lievito squaiado in do cuciari de late tiepido
ojo de semi
Su la tola se meti el quarto de farina bianca formando un muceto e in mezo se fa un buso. Se ghe buta drento el buro, tuto l’ovo, el zucaro, el sal, el lievito e se missa el tuto co’ un cortel e po con tute e do le man. Se riva cussì a aver una pasta lissa. Se la taia a tochi e se la rodola co’ le man, se la taia ancora a tocheti dandoghe la forma de chifel de patate. E come quei de patate se li frizi in ojo de semi.
Torta de sarasin
25 deca de buro
25 deca de zucaro
6 ovi
25 deca de farina de sarasin
25 deca de mandorle sminuzzade
1 bustina de zucaro de vanilia
1 vaseto de marmelata de mirtili rossi (ribes)
1 bustina de zucaro a velo
2 biceri de pana montata
Meter insieme el buro, 15 deca de zucaro, i rossi dei ovi e lavorar el tuto per renderlo spimoso. Zontar la farina e el zucaro “vanigliato” mescolando el tuto con forza. A parte se monta a neve i bianchi dei ovi zontando un poco a la volta el resto del zucaro e po pian pianin se la unissi col resto. Meter tuto nel forno per un’ora a calor “moderato”. Tirar fora la torta e lassarla che la se sfredi, taiarla in do in orizontale e spalmarla de marmelata de mirtili rossi (ribes). Rimessa a posto, darghe una spolverada de zucaro a velo e servir con la pana montata.
Koch de risi
20 deca de risi
10 deca de buro
10 deca de zucaro
10 deca de pan gratà
¾ de late
4 ovi
1 scorza de limon gratada
Se meti a cusinar in tre quarti de late, che boi venti deca de risi, missiai ogni tanto, che noi se tachi, fin che se suga tuto el liquido e se lassa sfredir. Se sbati dieci deca de buro con dieci deca de zucaro e quatro zali de ovo e se ghe zonta el riso fedo, la scorza gratada de un limon e quatro binachi de ovo sbatudi a neve. Se passa col buro squaiado el stampo e se sparpaia drento pan gratà, alora se ghe ribalta l’impasto e se lassa nel forno a 200 gradi per ¾ de ora e l’koch de risi xe pr